蘇錦樑記招玩fb live

蘇錦樑見記者時，有個女仔企喺記者堆度全程拎住iPad拍片，就係佢幫局長直播，Emily問佢係咩身分，但佢唔願意透露。（袁樂婷攝）

【明報專訊】facebook早前加入新功能live，用戶可以隨時現場直播自己喺度做緊乜，等其他朋友即時睇，唔少明星都鍾意玩fb live，估唔到連官員都加入，商務及經濟發展局長蘇錦樑(Greg)噚日見記者，講吓旅遊業發展、介紹吓美食車先導計劃嘅最新情况，而佢嘅fb個人戶口上亦同時直播自己見記者。

從片段可見，Greg同一齊見傳媒嘅旅遊事務專員朱曼鈴由走廊行緊出去見記者時，已經開始直播，Greg就一直講嘢，但似乎收音有啲問題，網上觀眾都唔係好聽得清楚。Greg會見傳媒時，拍片者企喺部分記者後面繼續直播，現場所見原來有一個女仔幫佢拎住iPad拍片直播，直至記招完結。Emily現場都有問呢個拍片者嘅身分，但佢就無透露喇。

僅10幾人同時睇

有網民喺Greg個fb留言讚好呢個新嘗試，但收看數目唔算多，直播期間一直只得10幾人同時睇，20幾分鐘嘅live約有200人觀看。Greg傍晚又喺fb上載出席印度商會周年酒會嘅相片，相中可見有唔少官員出席，好似特首梁振英、政務司長林鄭月娥及教育局長吳克儉，而同佢哋一齊上台合照嘅，仲包括官司纏身嘅前特首曾蔭權。

更多港聞

李秀恒選唔選立會 關黃之鋒事

【明報專訊】立法會9月改選，廠商會有邊個出嚟爭工業界（二）議席仍然係一個問號，商會內部盛傳廠商會會長李秀恒同副會長吳永嘉係出選大熱。廠商會噚... 詳情