【明報專訊】民協副主席譚國僑早前表示有意喺9月立法會選舉出戰九龍西，同主席莫嘉嫻撞個正着。譚國僑噚日出席傳媒聚會，話自己嚟緊喺黨內初選打嘅主題，係「反對二次殖民」，話中央近年舉動已經過咗港人底線，管治上亦違反一國兩制，所以要幫香港爭番自主權，其中一個方法就係民主派爭取立會過半數議席，壯大反抗力量。 講到「反對二次殖民」，好容易會令人諗起移民政策，不過譚國僑對於係咪主張限制新移民來港不置可否，話理解社會上有不滿新移民嘅情緒，但又無理由唔畀家庭團聚，所以社會要探討嘅係福利分配議題。至於支唔支持港獨，譚國僑就話要維持高度自治定港獨，社會之後要討論。 另外，港大法律系副教授戴耀廷早前提出「雷動計劃」，民協係第一個支持計劃嘅政黨。譚國僑噚日同Emily講，民協將會向泛民政黨發邀請信，希望同政黨面對面討論吓。
|
| |
| |
