【明報專訊】唔少大專生都會去政黨實習，青年民建聯(青民)今年就把握機會吸納新血。今時今日做實習生隨時會畀人「翻舊帳」，港大罷課委員會成員梁麗幗4年前去過公民黨實習，事隔多年，就畀校委會主席李國章形容係被政黨操控。不過，同樣經過實習加入民建聯嘅顏汶羽，就話唔認同實習生會被操控，因為每個人都係獨立個體，學生做實習都係想學嘢，完成實習之後佢哋做咩事，就唔到政黨指使喇。

青民計劃喺今年搞3次「招生」，希望搵60個學生喺議員辦事處或者黨部門做兩個月，又畀每人3000蚊津貼，等佢哋體驗政黨工作。呢次係前年佔領運動後，青民第一次搞實習計劃，青民主席顏汶羽話唔介意「深黃」嘅學生加入，只要佢哋唔喺辦公室搗亂就可以，佢又透露歷年嘅實習計劃，最終都有約兩成實習生加入咗民建聯。