買咗國產膽機 日本相機 湯家驊淘寶喊好平

買咗國產膽機日本相機湯家驊淘寶喊好平

[2015.12.28] 發表

【明報專訊】噚日有團體舉辦青年高峰論壇，其中一節邀請咗民主思路召集人湯家驊、時事評論員劉細良等講吓香港2047年前途問題。劉細良就話，淘寶可以睇到中國嘅一面，好似大家可以用30蚊買件波衫，但就要預咗洗兩次就會甩色，暗諷內地嘢無乜好。不過，湯家驊(Ronny)就唔多同意，呢位資深大律師仲同大家分享自己淘寶都有好嘅經驗。

夏蕙姨講獅子山精神

Ronny話，佢最近淘寶咗兩樣嘢，一係音響，形容雖然係中國製膽機，但只係需要法國名牌音響五分之一嘅價錢；另一樣係買咗日本原裝相機，淘寶價錢就平過市價兩成。其實Ronny想帶出嘅係，就算係內地都有好嘅一面，呼籲大家唔好以偏概全。

呢個論壇另一節就係講吓「新舊獅子山精神的交替」，大會就搵咗息影藝人黃夏蕙同電視劇《獅子山下》編劇劉天賜對談。夏蕙姨謙稱讀書唔多，但同大家分享吓經驗，佢話獅子山精神係不屈不撓、勤力，年過八旬嘅佢同大家話當年，話抗日戰爭時唔少港人好慘，成日都無嘢食，連屋企養嘅白鴿都要劏嚟食。

賜官形容夏蕙姨係「活化石」，呼籲年輕人把握機會同佢交流。有人就問「夏蕙姐姐」孝道問題，佢就回應話唔係睇表面，而真係要關心人，舉例話唔係同阿媽行街就叫孝順，而係要關心吓佢係咪好寂寞。賜官隨即插嘴問夏蕙姨「你阿媽係咪好寂寞」？夏蕙姨隨即話自己都80幾歲，佢阿媽「一早瞓咗覺啦」！