首批5架電動巴投入服務 網民怕着火 新巴：做好測試

首批5架電動巴投入服務網民怕着火新巴：做好測試

[2015.12.28] 發表

【明報專訊】為咗減輕本港空氣污染，政府早前用1.8億元公帑向比亞迪公司買咗36架單層電動巴士，首批嘅5架喺噚日同今日開始陸續投入服務，試驗兩年。電動巴分別係城巴11、12及25A號巴士線，同新巴81及78號巴士線，但呢5架只在港島行駛，少去港島嘅朋友就要再等吓。

36架巴士嘅外表同大細都同靠燃油發動嘅巴士差唔多，只係車身貼住「電動巴士」貼紙，仲多咗幾嚿白雲同一片藍天，比喻減少喺路上排放廢氣！事關電動巴士喺行駛前真係完全唔會排放廢氣，再唔會見到傳統柴油巴士嘅縷縷黑煙。

話雖如此，有網民都話有啲擔心，話晒比亞迪啲電動汽車喺內地發生過意外着過火。新巴城巴就話早前已經做咗一系列嚴格測試，確保機件性能同運作安全符合規格。另外，巴士充電4個鐘頭就可以行250公里，一日只需充電一次，都應該唔會行行吓冇電嘅，加上同款電動巴士喺全球已經賣出超過5000架，包括史丹福大學買嚟做校巴，美國加州長灘市運輸署亦買咗60架。

新巴同城巴仲有5架電動巴士預計出年上半年投入服務。政府又會成立監察電動巴士試驗計劃嘅專責小組，如果試驗結果好，就會推動廣泛使用。

更多港聞

中學小學合辦課後託管受益者回饋做小導師

【明報專訊】元朗天水圍有唔少雙職父母家庭，佢哋日間都要返工，未必照顧到仔女，天水圍伯裘書院和潮陽百欣小學就獲基金資助成立「晴天計劃」，開放兩... 詳情

被指打機唔投票何俊賢：我喺會議室門口

【明報專訊】Emily近日收到一封匿名投訴信，投訴民建聯漁農界立法會議員何俊賢（圖）今年2月，喺立法會財委會審議漁業貸款，以及表決時，不在場... 詳情