港大校委主席快有公布？

[2015.12.22] 發表

【明報專訊】香港大學經歷校委會風波，校委會主席職位懸空，而港大校友關注組近期流傳，話有校友收到風，特首梁振英(CY) 堅持己見，會喺聖誕節前夕派「聖誕禮物」，公布委任行會成員李國章做校委會主席；《東周刊》噚日都報道話好快有消息公布，搞到唔少關注組成員都無晒心情。

有政界嘅港大校友就同Emily講，如果消息屬實，咁就真係要溫馨提示北京嘅「阿爺」。點解呢？呢位校友就話，CY噚日上京述職，24號返港，而如果佢喺上京期間或之後，就公布委任李國章，咁就會被人覺得，CY呢次嘅動作係獲得中央首肯。佢話其實唔知「阿爺」對呢件事點睇，但如果「阿爺」根本無表態，而CY選擇呢段時間公布，咁CY即係變相擺「阿爺」上枱，甚至係「假傳聖旨」喎。