【明報專訊】警察公共關係科總警司「4點鐘許sir」許鎮德下月調任深水埗指揮官，許sir噚日同新任PPRB阿頭區展秋見記者。刑偵出身嘅區sir十分健談，Emily同行家都好有興趣知區sir嘅查案經歷。

畀同袍叫做「展大俠」嘅區sir話，近年深刻案件包括搗破全港最大鹹網「141」嘅過程，原來曾經出動飛虎隊，仲要搵埋警方「夾萬專家」去爆開集團嘅金庫，搜咗成300萬現金。展大俠講到，當時飛虎游繩入到網站總部，喺寫字樓起出證物同贓款，拉咗過百人，搜到嘅現金多到幾近塞爆佢寫字樓夾萬。

另一單深刻嘅案件，展大俠提到係舊年《明報》劉進圖被斬案，佢案發第二日提早抽調到O記返工主理呢單案，當時查到天昏地暗，見班伙記查通宵，佢有時都要跟到凌晨3、4點，索性喺警署瞓幾粒鐘，瞓醒又繼續做，終於將兩兇手繩之於法，至於幕後主腦的調查，展大俠話一直都仲查緊。

與「無味神探」同期出學堂

展大俠曾經進修港大犯罪學碩士課程，講開先知佢同「無味神探」陳思褀係同期出學堂，兩人相識，早排佢仲喺「無味神探」喪禮度致悼辭。

嚟到PPRB，展大俠話要做多啲工夫改善緊張嘅警民關係，先集中社交媒體，繼四點鐘許sir之後，警隊facebook會引入新卡通角色。