【明報專訊】早前有政府官員疑似用「金鍾仁」筆名，喺報章向自由黨田北俊(田少)發炮；自由黨噚日同特首梁振英(CY)見面傾施政報告，田少話當面同CY有傾到「唔開名」呢個議題，話自己理解官員有消息想放出嚟、但唔開名嘅做法，但政府喺回應議員同政黨嘅時候，都繼續用筆名嘅話，就會失分。田少話自己「好關注呢個問題」，建議CY如果官員將來想回應嘅話，就應該叫佢哋開全名講。 特首近期開咗個人facebook戶口，主要講吓花草樹木，但就無開放畀公眾留言，留言得嘅都係自己「朋友」；相比之下，田少嘅fb專頁有超過3萬個「讚好」，間唔中抽吓水，又開放畀公眾留言，受到唔少網民歡迎。田少話喺會面上無同特首交流點樣運用社交媒體，不過會後就同Emily講，話自己個專頁都有好多人留言表達對佢嘅不滿，但都唔能夠唔畀市民留言㗎。
|
| |
| |
