【明報專訊】香港吉野家牛肉飯專門店(下稱「吉野家」)噚日喺facebook專頁，以「我們憤怒了，已call 999」為題發post，話近日又收到誤傳，指佢哋係用日本福島嘅米飯同蔬菜嘅WhatsApp，今次真係忍無可忍，要報警處理。

用黑龍江黑土壤種嘅珍珠米

個post出咗1個鐘，就已經有近千人「讚好」，有網民仲抽水咁話，「肯定冇用福島米，否則賣唔到咁平」。香港吉野家就一再強調「一直無用福島的米飯蔬菜」，仲話「選擇沉默並不是解決問題的方法」，先需要「call 999」，並由CEO何文成親自到深水埗警署報警。

吉野家發言人強調，公司由開業以來都無用來自日本福島嘅食材，上年已經花咗唔少工夫澄清，以為事件已經告一段落，點知呢幾日又再收到呢啲中傷佢哋嘅流言。發言人同Emily講，佢哋用嘅米，其實係黑龍江黑土壤種植嘅日式珍珠米，而牛肉就係來自美國優質認可農場；佢哋所有來自日本嘅食材，都有用輻射探測器檢查，確保啲食材係安全先會運嚟香港，叫大家放心食用咁話。