【明報專訊】教育學院香港研究學院副總監方志恒上星期喺本報撰文，談及香港「自治權」來源問題，結果引嚟新聞統籌專員馮煒光(IC)寫文反駁，話對方對「香港自治權的來源有錯誤理解」。呢幕報章筆戰噚日就轉移戰場去到facebook，方志恒話自己要做一次nice guy(好人)，誠意「問候」馮專員，「以利本人日後晉升」。

方志恒話馮專員公務繁忙，但都抽時間回應佢，令佢諗起「三個字」：非常榮幸。佢強調對香港自治權嘅論述並唔係佢首創，又形容「馮專員雖沒有博士學位、卻是『鄰近經濟強國』的歷史系博士研究生，想必是好學不倦之人」，所以佢列咗一堆書介紹畀馮專員睇。

馮煒光質疑方志恒，將自己國家講成係「鄰近經濟強國」，「疏離內地乎？不承認自己國家乎？曲線提倡港獨乎？」但方隨即指出，鄰近經濟強國係海關官員嘅名言，話IC咁講即係質疑公務員搞港獨啫，仲建議IC不如玩少陣fb，「幫海關同事搞場愛國學習班先？」唔少網民都加入辯論行列，好熱鬧。

自由黨田北俊亦向IC開火，過去IC一直被認為化名「金鍾仁」喺傳媒撰文，噚日有報章專欄刊登一篇批評自由黨嘅文章，田少又入金鍾仁數，喺fb話，「金鍾仁，你唔好以為改咗個名就無人認得係你！」又話如政府今年畀泛民玩殘，千祈唔好呻，兩個鐘已有近600個like。