高醫生划龍舟 赤腳受訪
[2015.08.24] 發表
【明報專訊】食物及衛生局長高永文(中)出名多出席活動，噚日佢去咗醫學會嘅龍舟同樂日，喺沙灘上接受記者訪問，但原來高局長鏡頭前睇落係日常打扮，實則因為落場划龍舟而除咗對鞋。
話說佢原本只係主持龍舟點睛儀式，但就畀醫學會即興拉落場一齊划龍舟，玩得都幾開心，最後仲搞到成身濕晒，令對鞋入晒沙。高永文就索性除鞋拉起褲管，以隨意嘅形象頒獎同接受電視台記者「扑咪」。
同場嘅醫學會會長史泰祖(右)亦都有落場划龍舟，搞到全身濕晒，佢話一年一度嘅龍舟比賽係醫學會最受歡迎嘅活動，噚日由骨科學會贏得其中一項賽事。唔知係咪骨科要成日做手術「上螺絲」，參賽嘅醫生都練到手瓜好粗喎。
(食衛局提供)
更多港聞
相關新聞
