【明報專訊】一般人放假去旅行通常流連忘返，特首梁振英(CY)噚日就宣布提早結束休假，下午返咗香港，提前今日返工。傳媒行家噚日就喺機場「捕獲」CY，原來行家本來準備採訪運輸及房屋局長張炳良、政制及內地事務局長譚志源出訪台灣，點知撞正特首返港。
梁振英前日喺網誌先透露去咗歐洲及英國。港府早前發出嘅新聞稿，話CY由7月30日至8月8日上午離港休假。不過，政府噚日再出稿，話CY提前兩日結束休假，今日返工。究竟CY有乜嘢緊要事要趕返香港處理？大家無從得知，而特首辦嘅回覆就輕描淡寫，只話CY完成旅程，所以就提早返工。
吳康民接CY冰島來電 解釋質疑
前港區人代吳康民噚日喺《明報》撰文，就無意中透露咗CY行蹤，康民叔話佢日前寫文批評CY換局長嘅安排，認為CY應該聯同兩名離任局長一齊見記者，等大家「好來好去」。康民叔話，CY睇完篇文後，雖然喺冰島度假，但都打電話畀佢解釋，話「非不為也，是不能也」，即安排唔到兩名離任官員一齊見記者喎。康民叔仲話，佢都有打電話畀離任嘅曾德成八卦吓，但打咗幾次都打唔通。
