【明報專訊】慈善活動「鼠戰中環」，每年都吸引一班市民喺中環扮鬼扮馬為推廣精神健康組織「思健」籌款，今年唔經唔覺已經踏入第十年。活動搞手置地同兒童刊物《黃巴士》早前就搞咗個「未來鼠王服飾設計比賽」，收到超過400份參賽作品，有10人得獎。得獎小朋友噚日拎埋證書及「鼠王」肖像，同「未來鼠王」巨型模型影相(見圖)。 10座「未來鼠王」巨型立體模型，會換上由得獎者設計嘅耀眼新裝，今日起至10月25日喺置地旗下中環物業展出。 鼠戰中環競賽活動喺中環心臟地帶舉行，4項賽事包括團體賽「鼠戰」、個人賽「鼠王爭霸戰」、「社福機構鼠戰」，及專為5至10歲兒童而設嘅「未來鼠王戰」。12歲以下兒童更可悉心打扮競逐「至Cute豆丁鼠獎」，當日亦會有攤位遊戲等活動，賽事喺10月25日舉行。置地公司執行董事周明祖話今年係「鼠戰中環」10周年，希望藉慶祝活動帶來歡樂之餘，宣揚關注身心健康。 (置地提供)
|
| |
| |
;){kind=small}
