【明報專訊】6月係考試季節，相信唔少學校都正在考期終試。為咗考取好成績，好多學生捱更抵夜甚至通宵，但有無發現，即使通頂，最後嘅成績都唔係特別好？美國哈佛大學最新調查發現，原來學生用瞓覺同食嘢嘅時間溫書，係對考試無幫助㗎。 用食嘢時間溫書都無用 雖然唔瞓覺而讀書嘅人，一向被視為好學生，但呢項調查結果就顛覆傳統。哈佛教育研究所訪問咗4000名11歲至18歲嘅英國青少年，研究成一年咁耐。發現積極投入準備考試、兼有勇氣同堅持力嘅學生，佢哋嘅生活習慣普遍比較健康，同時亦有較穩定嘅情緒。 積極備考者 情緒較穩定 參與研究嘅辛頓(Dr Christina Hinton)話，研究顯示，展現決心並唔代表要不惜工本逼迫自己，學生喺積極追求好成績嘅同時，可以培養良好嘅EQ同有效率嘅學習方法。研究又發現，覺得自己好叻嘅學生，比起能力有限嘅學生更願意幫助其他同學。 以Emily嘅經驗，通頂溫書係無用嘅，倒不如早啲唞，養足精神應付第二日嘅考試好過。仲有，讀書唔應該臨急抱佛腳，平時上堂專心，考試就得心應手啦！
|
| |
| |
