汪明荃拒做閒角 爭取發揮演技
寄語TVB﹕每個年齡層演員都要重視
【明報專訊】67歲汪明荃(阿姐)明年入行50年，半世紀奉獻給演藝事業，阿姐永不停步，跟熱播新劇《華麗轉身》一樣，在不同階段尋求突破轉身的機會，讓她一直站穩女主角之位。她不甘於只講「煮個麵你食」的無發揮角色，有自己的堅持及爭取，「我哋這個年齡層演員累積豐富經驗，公司應該重視」。《華麗轉身》是她與熒幕最佳拍檔劉松仁35年來第3度合作，松哥勁讚阿姐是演藝界代表，氣質與魅力無人能及。
記者﹕葉靜文 攝影﹕孫華中
汪明荃(阿姐)與劉松仁35年前合演《京華春夢》創造經典，15年前再合作《婚前昏後》令人印象深刻，《華麗轉身》是第3度合作，默契更進一步昇華。環顧演藝圈，松哥與阿姐外形合襯，為跟松哥合作，阿姐不介意由冬天等到天熱，遷就松哥的檔期。阿姐說﹕「我同編審歐冠英講今次一定要搵松哥，我哋是落實後再傾劇本同角色，大家都期待再合作，意外地與鍾嘉欣、方力申首次合作，出來的效果很好。」
35年前合演《京華春夢》
再與阿姐結戲緣，松哥說﹕「我哋合作上有好大的信任，有商有量，互相提點，不會有隔膜及顧忌，什麼都可以講，好開心，大家出發點都是為個劇。」阿姐好認同﹕「唔知點解，之前合作兩部劇都無這種感覺。拍《京華春夢》時可能大家還新，戲分重、各顧各，沒有太多交談。《婚前昏後》他有好多戲同蘇玉華，我就同劇中子女如張可頤、楊怡的戲較多，初時都有少少呷醋，但都是劇情需要。可能年紀大了，更加珍惜每一次的合作，這種老拍檔的感覺同秋官(鄭少秋)都有。現在同秋官合作《Sunday靚聲王》，我話他以前只是照顧其他女仔無照顧我，秋官就話﹕『我?家淨係照顧你一個！』」松哥亦感慨道﹕「年紀大咗，會珍惜多些，35年到現在仍然可以再合作，幾難得，真是一次就一次，阿姐叫到一定做。」阿姐笑說﹕「下次不用等10年啩！到時不知仲做唔做到！」
當年與阿姐同列「四大花旦」的李司棋去年約滿無綫後未有續約，司棋姐曾感嘆說﹕「我不會是永遠的女主角， 找到好的台階自己行落去， 適當時機就要走。」她覺得如果要在鏡頭前行行企企，說句「我煮個麵你食」的對白掙騷錢，她情願留在家中叫工人給她煮個麵。
「累積經驗 不是年輕演員可做到」
阿姐效力無綫快將45年，演過無數角色，明白要在角色上有突破不是易事。「公司都有難處，我哋這個年齡如果要做行行企企，像司棋姐之說，只講一、兩句對白，好似『煮個麵你食』，我都不是咁鍾意啦！我本身無司棋姐拍咁多，通常一年一部或者年半一部，我覺得公司都應該滿足我哋囉！每個年齡的演員都需要重視，我哋這個年齡累積好多經驗同經歷，不是年輕演員可以做到。內地、甚至台灣、外國都好重視這個年齡同級數的演員，我覺得公司都應該這樣。所以每次我有份演出，都希望盡自己能力去爭取，在演出、劇本、戲路方面，當然最後都要服從公司。編審歐冠英同我講過好幾次，幫我哋度角色有難度，因為我演過太多角色，做過好多不同類型的媽咪，又希望是一個重心。過去幾年演的角色都太類似，想有深層些的演出。我好重視每次自己的劇集，負責任演員一定是這樣。」
松哥好奇問阿姐下套劇演什麼角色？阿姐說﹕「諗緊喇！又老啲喇！哈哈！」松哥立即說﹕「不老不老，不老的傳說。」
阿姐奉獻演藝界 要長青
阿姐在演藝界快將半個世紀，65歲的松哥亦踏入45年，兩人坦言曾有一剎那退休念頭，但最終都打消了，對演藝工作仍然熱愛。阿姐說﹕「如果好攰的時候都有諗過退休，但不是全退，好似司棋姐講鍾意先做。我覺得每個人工作方式不同，我鍾意有人推動我，觀眾永遠對我有期望，我就一定要前進。如果可做可不做，就沒有了鬥志。始終我覺得我是屬於演藝界，而演藝界什麼年齡的演員都有，我是奉獻給演藝界，要長青。」
早綵緋晚演出 體力驚人
松哥大讚阿姐是演藝界的代表﹕「她是成功的藝人，這個年齡仲可以做主角，有此分量無乜幾多個。」阿姐說﹕「我覺得要好多方面配合。」松哥說﹕「當然要配合，但她本身很有魅力，《華麗轉身》裏她的氣質無人可以做到。不單是氣質，最後一場演唱會的戲，她要唱歌、跳舞，當日早上綵排，晚上演出要拍到通宵，要有體力先得。具備這麼多條件、名氣，加上工作態度，我哋好佩服她。」阿姐認為劇中她演的華芳凝角色，是代表他們這一代人做事的工作態度。「可能年輕時挑剔，要爭取，是好正常的事。要達到這個階段，要面對好多競爭。」
永不言退 多少都要做
松哥直言曾想過退休﹕「原本有諗過，但有個老師叫我千祈不要諗退休。他的意思是如果你諗退休，個人就會無動力，所以做多做少都要做。我想想都覺得對，我哋這個年紀更加要保持工作。」阿姐贊同﹕「有得做就做囉！不過有時自然規律不容許做太多，順其自然，體力應付到就做，做不到或者做幕後，你估我做幕後得唔得？反正一開始就畀人叫『汪監製』。」松哥讚阿姐只是鞭策自己﹕「有阿姐喺度鞭策大家，工作氣氛都好些，帶動整個團隊好認真。阿姐好肯畀意見，後輩跟她學到好多，如工作態度、如何處理角色。」阿姐說﹕「有時我都體諒大家拍攝時間長真的好攰，其實我不是鞭策得太犀利，會放鬆些。」松哥指阿姐不用做什麼，喺度就起到作用。阿姐說﹕「我都是在鞭策自己，作為專業演員，好多東西投資在我哋身上，還有團隊配合。除了幕前演員，幕後都付出好多，好似攝影師要長期企無得坐，要珍惜及尊重每個崗位的辛勞。松哥都好好，會跟年輕演員讀劇本，如演我大女的趙希洛，她的角色幾難做，松哥幫助她融入角色。」
密密傾劇本 有商有量
無綫劇集被批評水準下降，過往有指松哥會給予很多意見改善。阿姐望着松哥笑說﹕「話你改劇本呀！傳聞你成日改劇本。其實大家是有商有量，邊得閒改呀！今次劇本我哋事前都傾咗好多次，最重要是溝通。」對於獎項他們都沒有太大追求，曾先後憑《婚前昏後》及《我的野蠻奶奶》奪視后的阿姐說﹕「我攞咗好多獎喇！」松哥說﹕「獎項對我來說無意義，我最緊張及享受是拍攝過程，之後好怕宣傳、影相。」
《華麗轉身》講述殿堂級歌后華芳凝面對事業、家庭、親情的衝擊，似有點阿姐的影子？阿姐說﹕「是講我們那個年代歌手的經歷，每個人在人生路途上可能有忽略及遺憾，看重視程度，人生不會是太完美。今次個劇講倫理，但手法輕鬆溫馨，各種感情線都寫得好好。我覺得韓劇拍得好，其實兜兜轉轉都圍繞着父母、子女、男女朋友、同事、上司、下屬，我覺得我哋都要捉緊這些重心，不可以忽略匆匆而過，要給觀眾細味及消化，產生共鳴，感動他們。這個劇會有啟發性，在人生際遇上可以反思。」
讚鍾嘉欣方力申好夾
阿姐首次與鍾嘉欣及方力申合作，「嘉欣以前多演被人欺負的角色，這次演剩女想搵白馬王子；方力申角色亦好出位，搞搞震搵機會，這個配搭好得意好夾。王梓軒演我個仔都有難度，他因壓力太大有精神病，他演得很好，我似在他眼裏看到有話想跟我說，感覺幾恐怖。之前他有跟我溝通過如何演繹，他做得好好。他有場彈琴戲發脾氣，想告知我他如何努力，我同香香(岑麗香)都好感動，香香都忍不住喊，團隊精神好好。」
劇中阿姐配合歌后角色演唱3首歌《閃爍登場》、《銀河》、《華麗轉身》，講述不同年代的心態轉變，阿姐落足心機並出動私伙服裝，務求做到盡善盡美。
服裝(汪明荃)﹕Aquascutum
■更多娛樂猛料 ﹕ol.mingpao.com
