聞「議會內多狗奴才」 陳健波轟大嚿「人渣」

聞「議會內多狗奴才」陳健波轟大嚿「人渣」

[2015.05.07] 發表

【明報專訊】立法會工務小組噚日討論啟德體育園區前期撥款問題，會議朝早8點半舉行，議員就好好火，保險界議員陳健波同人民力量陳偉業(大嚿)嗌大交，最後陳健波更自行離場抗議。話說今次已經係第三次討論啟德呢個項目，泛民又有人提中止待續，搞到陳健波忍唔住話，無質素嘅問題已經提咗好多，議員唔明官員答覆只會繼續唔明，搞到社民連梁國雄(長毛)點名話陳健波無睇文件，又質疑佢助理無寫稿畀佢讀。

陳健波就反駁，唔睇文件嘅係長毛，強調唔能夠因為有人不斷話唔明，就要議會內69個人不斷遷就一個人。呢個時候大嚿加入戰團，點名批評陳健波為政府幫倒忙，又話議會內好多「狗奴才」，總之政府提出嘅就永遠支持。呢句話就激起陳健波把火，話議會邊個係狗奴才，市民好清晰，但「陳偉業呢啲人渣要小心啲」。

主席叫收回言論陳健波離場抗議

主席梁家傑就要求陳健波收回「人渣」二字，但陳健波要求大嚿一併收回「狗奴才」字眼。陳偉業就澄清「狗奴才」係泛指保皇黨，不過佢歡迎任何人對號入座，搞到陳健波仲嬲，改正話「所有拉布嘅都係人渣、係議會人渣」，雙方僵持不下，最終陳健波堅拒收回言論，但因為唔想阻延會議，所以自己離場，「抗議陳偉業呢個人渣」。

更多港聞