粗口爭議 何君堯叫鄧小樺當眾脫衣

粗口爭議何君堯叫鄧小樺當眾脫衣

[2015.05.04] 發表

【明報專訊】嶺南大學學生會早前舉辦嘅音樂會，因為有樂隊演唱含粗口歌曲而引起連串風波；噚日《城市論壇》就討論粗口辱警事件，台上台下反應都激烈，新界關注大聯盟發言人何君堯就話，若個人自由超越社會期望及法律期許時，就唔可以做，佢並以同場出席論壇嘅文化評論人鄧小樺作例子﹕「鄧小姐可以話我係行為藝術，你可以企喺台上面脫晒件衫去表達都得㗎，點解你唔咁做呢？」

何君堯多次批評學生嘅粗口歌帶侮辱及恐嚇性，超越法律底線，之後多次出言挑釁鄧小樺及嶺大學生會會長劉振琳，叫佢哋夠膽就讀出粗口歌詞，又一度將紙張擲向劉振琳一方，即被主持人謝志峰阻止。

鄧小樺：雙重標準

台下同樣混亂，正義聯盟召集人李偲嫣及保衛香港運動約20多名成員帶埋標語牌踩場，多次喺鄧、劉發言時大叫「垃圾、畜生」。鄧小樺噚晚於其facebook留言，指對現場有團體不停講粗言，卻攻擊音樂會有粗口歌，就係雙重標準，「公共言論空間的水平就是這樣敗壞的」，並稱對作為法律界人士，何君堯只是不斷引人作出觸犯《廣播條例》的行為如粗口及裸露，感到荒謬。鄧話謝志峰也因此很緊張，Emily在場聽到粗言俗語滿天飛，都替港台擔心會否因此無辜遭投訴。