陳智思新公職管「糖鹽」
「高永文睇中我有病」
[2015.03.14] 發表
【明報專訊】政府噚日公布新一輪公職，被視為有潛質選特首嘅陳智思，啱啱做完6年可持續發展委員會主席，最新公職任命係「降低食物中鹽和糖委員會」主席。佢話政府今次揀佢，全因佢有病，啱做呢個位咁話。至於同政府口徑未必次次一致嘅通訊局主席何沛謙，就有得留低續任2年，通訊局嚟緊仲要處理商台續牌同港視再申請免費牌，佢坦白講，未來工作真係有高度挑戰性。
食衛局噚晚公布成立「降低食物中鹽和糖委員會」，搵咗陳智思做主席，任期3年。喺北京出席全國人大會議嘅陳智思話，新公職係推廣健康飲食，高永文睇中佢有病。但係點解高永文知佢有病？佢話，高永文入政府前係佢公司董事，知佢係長期病患者。
陳智思有血管病，啲血去唔到個腎，18歲時兩個腎只得一半功能，住院時食物要用代鹽，佢話無咗鹽最難食嘅，竟然係雪糕。
何沛謙續任通訊局主席
另外，已做咗3年通訊局主席嘅何沛謙同9名成員齊齊續任2年，商務及經濟發展局發言人話，公職唔可以做多過6年，今次續任2年，係考慮要令通訊局嘅經驗同持續性有彈性，避免3年後全部人齊齊走。
何沛謙就電視牌決定贏咗唔少掌聲，除咗建議政府發3個免費牌，亞視訴訟更揭佢原來已經唔建議向亞視續牌。何沛謙覆Emily話，未來工作具有高度挑戰性，幸好身邊仲有一班好成員。
更多港聞
【明報專訊】描述美國黑人民權領袖馬丁路德金如何公民抗命嘅電影《馬丁路德金：夢想之路》（Selma），主題曲《Glory》喺今屆奧斯卡贏得最佳...
詳情
相關新聞
