【明報專訊】噚日港大比較法與公法研究中心同城大學生會喺城大舉行政改論壇，立法會議員謝偉俊(Paul)勸學聯秘書長周永康加入建制爭取民主，話喺街度瞓生晒暗瘡，搞到唔靚仔啦。周永康聞言保持微笑，強調唔會入建制。 指梁家傑曾是「法界內建制派」 本來全國政協常委陳永棋都會同周永康同台，講述對後佔中嘅見解，但棋哥臨時甩底，主辦方話棋哥怕有太多記者，會搞到好似辯論咁，如果係閉門，都想同學生見面。雖然無得睇棋哥同周永康對談，但辯論都有火藥味。 身為律師嘅謝偉俊話當年，話自己40歲時都好激進，又除衫、又拍廣告，最後被停牌13個月，當時曾被身為「法律界內嘅建制派」梁家傑批評。阿Paul又話梁家傑曾幾何時係代表溫和理性嘅專業人士，「今時今日邊啲人為咗選票，逼住放棄呢條路線，而上街頭搞五區公投？」 傑哥立即反擊，話「我從政11年來，民望最低、低到最低就係搞五區公投」。但阿Paul窮追猛打，反問﹕「當年如果你知道五區公投時民望最低，會不會做呀？」傑哥咪都未揸穩就回敬﹕「會做，當時表明預咗亡黨……當時我哋要過程，唔係結果。」
|
| |
| |
;){kind=small}
