【明報專訊】話說金鐘清場後，新民黨主席葉劉淑儀就喺facebook質疑學民思潮召集人黃之鋒冇陪伴戰友一齊被捕，違背「公民抗命 無畏無懼」口號同精神。黃之鋒噚日喺港台《千禧年代》回應話「多謝佢提醒」，佢解釋雙學向來有分工，「有人幕前有人幕後」，如果冇分工會影響組織運作，到時葉劉又可以「有位入」，批評「學生唔識瞻前顧後」。學聯常委、中大學生會會長張秀賢喺同一節目話，葉劉作為立法會議員應盡自己嘅職責，而唔係喺度做「軍事評論員」。

梁振英葉劉 田少揀唔落

自由黨田北俊喺商台《在晴朗的一天出發》隔空搭嘴，話唔理係葉劉定邊位，想喺香港呢個複雜社會中當選特首就「要多啲朋友」。田少話，葉劉喺立法會連建制派內嘅朋友都唔係特別多，若果參與普選就好難贏；佢仲話，如果下屆特首選舉得番現任特首梁振英同葉劉兩位，佢投「白票(機會)會較多」。