【明報專訊】?家大部分電視節目都配有字幕，但原來聾人單靠睇字幕，係好難吸收晒節目嘅資訊。協助聽障人士嘅組織「龍耳」就成立「龍耳電視」，提供配有手語翻譯嘅節目，噚日喺YouTube頻道首播，遲吓仲連靈異節目都有得睇?。

宣傳片提防傳銷呃聾人

負責龍耳電視製作嘅馬芬燕同Emily講，政府好多宣傳片同廣告都冇配上手語翻譯，但手語同文字嘅文法唔同，單靠字幕好難理解晒全部內容；聾人經常誤墮騙局，好似佢聽障嘅哥哥早前就因為缺乏資訊，被非法嘅傳銷公司呃，損失近4萬蚊。組織有見針對聾人群體嘅傳銷騙案近日死灰復燃，於是就用呢個題材拍片，作為噚日啟播嘅第一炮。

除咗資訊節目，龍耳電視連鬼故事都有得睇！本身係聽障人士嘅龍耳電視監製朱芷茵話，聽障人士對鬼嘅概念好好奇，「鬼行路有無聲㗎呢？係咪會發出怪聲嚇人？」，呢啲統統可以喺同鬼王潘紹聰合作嘅手語翻譯版《恐怖在線》睇得到。

兩人都話最想有人手做每日新聞節目，龍耳電視暫定每周更新一集節目，有興趣讀者可喺http://www.youtube.com/silencedeafhk收睇。