【明報專訊】新高中學制通識科嘅其中一個宗旨係培養學生「critical thinking」嘅能力，呢個詞一直都譯作「批判性思考」，不過教育局最近開始譯作「明辨性思考」。 立法會議員葉劉淑儀噚日就書面問教育局，「批判性思考」個譯法會令學生傾向以批判態度對待別人嘅意見，教育局出版嘅刊物同網頁會唔會全面統一採用「正確」譯法「明辨性思考」呢？ 教局：兩者並行 教育局回覆話，根據中國社會科學院語言研究所詞典編輯室編嘅《現代漢語詞典》第5版(2007年)，「批判」一詞嘅意思係「分析判別，評論好壞」或「對錯誤嘅思想、言論或行為做系統嘅分析，加以否定」，而「批判思維」或「批判思考」無論喺內地、台灣、澳門定香港教育界都廣泛使用。 教育局明白坊間有人對批判性思考嘅意思有誤解，以為只作負面批評，或者為批評而批評，所以同意將「critical thinking」譯作「明辨性思考」，但仍保留「批判性思考」嘅譯法，兩者並行，避免會令人誤會引入另一種能力取代現有嘅。
|
| |
| |
