【明報專訊】支聯會噚晚改選，由原本擔任秘書嘅何俊仁自動當選主席，佢話本土派另搞六四晚會，仲話要同中國割蓆，所以支聯會今年工作目標之一係要就此作回應。支聯會唔係擔心本土派「搶客」，但希望年輕一代明白，爭取平反六四係作為中國人應有嘅責任，「希望佢哋感性上都認同，唔止係理性上講民主自由」。

回應本土派另搞六四晚會

何俊仁又話，六四紀念館影響力未夠大，所以希望設立相關網站，並爭取同網台合作，由支聯會嘅人開咪講六四，力爭青年人「民心」。

至於支聯會原主席李卓人就轉任秘書，據何俊仁講，阿人想專心搞好工黨，但仍會幫支聯會做好多嘢，例如搞六四晚會。副主席就同舊年一樣，由麥海華同蔡耀昌出任。

支聯會由舊年7月至今年6月底，支出有347萬元，收入就有614萬元，淨收入267萬，淨收入多過之前一年四成，但六四紀念館仲有過百萬虧損。