【明報專訊】金鐘嘅特首辦近期被示威者包圍同封路，特首梁振英(CY)留喺禮賓府工作，而逢周二嘅行政會議亦改咗去禮賓府開兩次會；示威者近日無再喺特首辦外聚集，出入口解封，據知CY前日已經乘車返特首辦工作，局長們都歸位返政總開工。行會噚日亦回復正常，返去特首辦開會。

一班行會非官守成員噚日喺開會之前，有幾名成員特登走出門外，逐一跟駐守嘅警員同保安握手，林健鋒仲邊行邊向在場警員豎起手指公讚好。林健鋒話警員近日好辛苦，見到佢哋休息時都只係屈喺架警車內，所以佢哋去同警員打打氣，佢仲話握手時，警員們都笑得好開心回應。