【明報專訊】監警會主席翟紹唐做埋5月卸任，噚日佢出席《監警有道》研討會，致辭時不忘「抽一抽水」，佢話監警會過去6年嚟，由較鮮為人知嘅機構，轉變成最近港大民調顯示有多過一半人認識嘅法定組織，比起現屆政府都算幾大成就。「翟少」提到，最近有報道話啲副局長同政治助理無乜人識，雖然佢無點名，但Emily就即刻諗起上星期去立法會連主席曾鈺成都唔識佢嘅商務及經濟發展局副局長梁敬國嘞。

秘書長朱敏健鬧雙胞？

噚日喺港大舉行嘅《監警有道》研討會都幾多嘉賓，包括來自英國嘅學者同加拿大嘅監警機構總監。Emily就喺芸芸嘉賓中搵到一個好似同監警會秘書長朱敏健同名嘅「Chu Man Kin」，一問之下原來係退休海關朱文健，𠵱家嚟咗監警會做審核主任，佢都話好多人睇名都誤以為佢係秘書長。