【明報專訊】世界盃6月又嚟，4年前上任中文大學校長無幾耐就同師生、校友喺校內百萬大道睇世界盃決賽嘅沈祖堯，今屆再度出動，將於7月14號(周一)世界盃決賽日重辦睇波盛會，仲請埋政治與行政學系高級講師蔡子強同副教授馬嶽「係咁意」講波。

蔡子強馬嶽

「係咁易」講波

世界盃決賽7月14號凌晨3點開始，參加者兩點半就可以入場，睇球技表演同參加幸運抽獎，大會仲有飲品同小食供應，地點照舊係百萬大道，唔使報名㗎。沈祖堯一向冇乜睇波，所以唔好預佢講波啦，但就特登請咗捧德國國家隊嘅蔡子強，同埋捧意大利國家隊嘅馬嶽嚟講波。不過蔡子強講到明，佢哋只會開場時估吓邊隊贏、中場估吓之後嘅形勢咁，唔會邊睇波邊評論，以免嘈住其他人。

4年前除咗佢兩個外，當時啱啱由中大過檔港大、𠵱家做緊港大社會學系系主任嘅呂大樂，嗰時都有份講波㗎，但今次冇佢份喎，中大話，係因為佢到時唔喺香港呀。