【明報專訊】商務及經濟發展局長蘇錦樑早前呼籲市民要「包容」內地客嘅便溺行為，言論引嚟網民不滿，噚日發起去蘇局長位於半山嘅屋企門前「便溺」，最後有十幾人響應號召。呢班人仲愈玩愈過分，全程播放拜祭音樂，同改編自葉振棠《忘盡心中情》嘅「蘇包容」主題曲，又帶埋陰司紙同標語牌放落火盆「燒」畀局長，仲有網民跑去蘇宅對面嘅教堂外，向住教堂作狀「小便」，話耶穌基督都包容佢啲尿。

蘇：不應褻瀆主基督

網民連上帝都玩，本身係教徒嘅蘇錦樑呢次實在不能包容，噚晚就喺個人facebook留言鬧網民，「絕對唔應該褻瀆主基督之名！」，佢又透過新聞處回覆查詢話尊重市民表達意見自由，大前提係唔應該騷擾一般市民正常生活，仲話希望集會者可以將時間同精力，投放喺更有建設性嘅事上。

番薯製便便 局長家外「如廁」

示威者用番薯同花泥自製唔同形狀嘅「糞便」道具，放喺地上扮急如廁，不時高呼「我要借廁所」、「蘇錦樑收嘢」等口號，仲將標語牌放落火盆「燒」畀局長，之後佢哋企圖走入大廈，但即時畀多個警察同保安攔截。