【明報專訊】有指「地產霸權」令市民捱貴租、捱貴貨，甚至連公營機構都唔能夠倖免，平等機會委員會租用太古城嘅辦事處，2005年搬入去時呎租22蚊，之後業主加咗幾次租，去到2011年加到42蚊，今年底要再續租，平機會估計租金又會再升，需要動用儲備先應付到，所以希望政府可以有永久辦事處畀佢哋。不過，政府過去都無接納要求，而噚日唔少立法會議員都幫口，話支持平機會有永久辦事處。

需用儲備 盼獲永久會址

平機會主席周一嶽噚日去立法會匯報平機會工作，吐苦水講吓呢個問題，佢話每年租金開支約900萬元，佔總開支9%，已經要用儲備應付。唔少議員聽到都好關注，好似民主黨主席劉慧卿就問，如果政府唔畀永久辦公室平機會，到時加租加到平機會無法負擔，係咪要周一嶽「瞓街」？政制及內地事務局副秘書長梁松泰就話當局會考慮，但指目前平機會仍有儲備應付租金喎。

本身係平機會委員嘅謝偉俊亦表明，今年續租隨時加到超過50蚊一呎，作為公營機構，應該要有永久會址，留番啲資源做推動較有爭議嘅事。旅遊界姚思榮都幫口，話如果平機會有詳細建議，例如用2億買個永久會址，都值得考慮。