【明報專訊】一直為弱勢社群爭取福利嘅工黨立法會議員張超雄,噚日喺立法會口頭質詢社署轄下為輕度弱智兒童而設嘅「兒童之家」情况。佢話現時「兒童之家」入住年齡上限係18歲,認為無法照顧到一啲滿18歲又未讀完書嘅弱智人士。估唔到金融界嘅吳亮星都關注社福問題,發言問官員,「本會(立法會)成員係咪有優先安排子女使用兒童之家嘅安排?」此言一出,部分議員私下嘩然,唔知吳亮星係咪想影射張超雄有一個智障女兒。
問議員家屬有否優先惹嘩然
吳亮星之後同Emily解釋,話好同情張超雄嘅家庭情况,但話張議員提問時,無做任何「利益」申報。
吳:同情張超雄 勿對號入座
吳又話,留意到張超雄成日口頭或書面查詢有關弱智兒童嘅問題,難免令人諗到同佢女兒有關;吳指佢向官員嘅提問,並無指名道姓,叫人唔好對號入座,只係希望從「正面角度」,向政府查詢有無議員優先使用服務呢個安排。不過,有建制派議員私下同Emily講,覺得吳亮星呢句太過火,就算唔同意張超雄嘅觀點,都無謂喺人家傷口灑鹽。
勞福局長張建宗回應議員提問,話社署有酌情機制處理超齡人士入住宿舍安排,由2009/10年度至今,已有11名年滿18歲而讀緊書嘅人士,因為家庭無辦法畀到合適照顧,批准佢哋延長留喺「兒童之家」。