【明報專訊】電影《食神》入面，主角就話去完「中國廚藝訓練學院」(星爺話﹕即係少林寺嘅廚房！)受訓後回港參加廚藝賽；現實世界中，個名差唔多嘅「中華廚藝學院」噚日直頭借出場地，幫李錦記嘅「青年廚師中餐國際大賽2014」搞港澳區選拔賽，吸引55名未夠40歲嘅廚師參賽(圖)。有飲食業界人士話，廚藝學院畢業生前景理想，未畢業已經全數獲聘，人工高過大學生。 為咗選出8名明年代表香港同澳門出戰國際賽嘅廚師，李錦記同廚藝學院合作搞選拔賽，要參加者喺90分鐘內，用牛肉同龍躉完成兩道「新春團圓菜」，入選廚師明年會同日本、大馬對手一較高下。呢個比賽認真架勢堂，有10個港澳地區嘅業界團體支持，話要透過比賽提升專業形象，吸引後生仔入行。 雖然中華廚藝學院並唔係少林寺廚房，但人稱醒哥嘅名廚楊位醒話，該校每年1200名畢業生質素相當高，加上業界求才若渴，所以就業情况理想，前景亦好，希望後生仔唔好再以為中廚係「賭鬼、爛佬」而拒絕入行。 (李錦記提供)
|
| |
| |
;){kind=small}
