【Emily】市民睇尾場戲cosplay告別九展 12歲攞首座獎盃 15年後重回舊地

噚日九展最後一日，千計市民陸續嚟告別，臨近5點仍有大批人喺中庭圍觀畫家作畫，保安引導市民離開。（鄧家烜攝）

林先生（左）噚日同爸爸帶埋喺九展攞到嘅人生第一個圍棋賽冠軍獎盃特登嚟打卡。林爸爸話嗰日見證囝囝攞獎係好好嘅回憶，遺憾近年嚟錯過咗阿仔部分比賽。（鄧家烜攝）

九展噚日下晝5點鐘關門，但過咗7分鐘左右，專登嚟告別嘅市民先全部離開晒，職員先可以閂門。之後仍有唔少人喺門外逗留，繼續以畫畫、影相等方式紀念。（鄧家烜攝）

【明報專訊】有29年歷史嘅九龍灣國際展貿中心(九展)，係唔少港人睇表演、車展等回憶之地，噚日下晝5點鐘正式「結業」，千計市民到場告別。九展最後一日，商店、電梯等皆已停運，但喺地下嘅戲院「星影匯」仍有營業，最後一場戲開下晝兩點九，戲院3點鐘拉閘，有戲迷喺兩點58分衝入戲院。睇尾場戲嘅陳先生話自己係街坊，每半年嚟睇戲三四次，噚日特登喺最後一日嚟睇戲告別九展。

千計市民前來道別

話晒九展都有成卅年歷史，同唔少港人有交集，27歲嘅林先生於15年前、即係12歲時就喺呢度攞咗第一次圍棋賽冠軍，佢噚日帶爸爸及攞埋當時個獎盃嚟影相打卡，佢話嗰次係第一次嚟九展，呢度亦係佢事業嘅起點。

蔡先生同黎先生同為動漫迷，約4年前喺九展嘅RG同人誌相識，一齊觀展已經六七次，噚日特登嚟告別九展，仲帶埋動漫物品嚟一齊回憶一下喺呢度嘅經歷。

動漫迷結識同好 歷年齊觀展

現場有人播放歌曲Auld Lang Syne，亦有MIRROR、Lolly Talk等男女團嘅歌迷到ViuTV舊址打卡，仲有動漫迷cosplay到場或帶動漫公仔舉行「告別儀式」。臨近5點鐘現場市民一齊倒數，並鼓掌歡呼，「超時」近7分鐘所有人先全部離場。

九展2021年被億京發展等財團收購，建議改建分層住宅，另興建1幢商廈及1幢混合零售、社福大樓。市民霍先生話希望重建後仍可辦展覽，因認為香港得九展一個門檻唔太高嘅辦展場地。

更多港聞

【Emily】將軍澳入境處結婚禮堂啟用 5打卡位 新人滿意

【明報專訊】將軍澳入境處總部嘅結婚禮堂上個禮拜三（6月26日）正式啟用，截至上周六（6月29日）已有228對新人預約喺度舉行婚禮，其中28場... 詳情

【Emily】工聯慶回歸 睇戲學習鄧小平品質

【明報專訊】為慶祝香港回歸27周年、迎接中華人民共和國成立75年，工聯會與屬會舉辦百多項慶祝活動，話預計超過8萬人次參與。工聯會噚日喺工人俱... 詳情

【Emily】陳國基赴聯國人權會議

【明報專訊】聯合國人權理事會將開會討論有關中國人權狀况審議報告，政府噚日公布，政務司長陳國基今日七一凌晨出發去瑞士日內瓦，以中國代表團副團長... 詳情