【Emily】莫乃光郭榮鏗合體 搞研究組織
[2022.03.26] 發表
【明報專訊】先後離開香港嘅民主派前立法會議員郭榮鏗同莫乃光最近有新動向，Emily聽聞兩人喺美國成立咗名為「China Risks Institute」(CRI)嘅組織，直譯係「中國風險機構」。
冀助突破零和遊戲
根據CRI單張，CRI對外定位係非牟利、無黨派嘅研究組織，專門向政策制訂者、國際企業和非政府組織分析中國崛起嘅風險同機會，包括人工智能、科技、人權同經濟，並與曾經同中國官商民間親身交手嘅國際專家合作，以突破「為價值觀『企硬』」(Standing up for our values)同「經濟機遇」(economics opportunity)兩難選擇嘅零和遊戲，甚至表明唔會迴避提出唔受歡迎或高度批判嘅分析。
CRI又話，佢哋嘅分析會始終扎根於人權、法治、民主價值，以及社會責任和商業道德之中。
香港監察高級政策顧問參與
郭榮鏗同莫乃光落水，目前CRI話參與者有前香港立法會議員、國際學者、前外交官、人權分子等。已知公開參與嘅包括「香港監察」嘅高級政策顧問Sam Goodman。根據Goodman近日喺《外交雜誌》等刊物撰文透露，CRI會喺5月正式啟動。
更多港聞
【Emily】民研：計劃移民者增 最多因自由變差
【明報專訊】唔少港人移民，香港民意研究所舊年起做咗3次相關調查，最新一次喺3月21至24日，以電郵訪問6723人，再經反覆多重加權調整，當中... 詳情
【Emily】在港日本人送飲品 為瑪麗醫護打氣
【明報專訊】疫情之下，醫護一直喺最前線照顧病人，在港日本人團體「香港日本料理店協會」同「香港日本食品及料理業協會」話，在港日本人社群成日用到... 詳情相關新聞
