【Emily】民研：計劃移民者增 最多因自由變差
[2022.03.26] 發表
【明報專訊】唔少港人移民，香港民意研究所舊年起做咗3次相關調查，最新一次喺3月21至24日，以電郵訪問6723人，再經反覆多重加權調整，當中24%受訪者有計劃永久離港，較舊年8月嘅第二次同類調查升4個百分點，亦係3次調查中最高。值得留意係，調查細分民主派同非民主派支持者回應，非民主派有計劃移民嘅比例增幅較明顯，由舊年8月嘅12%升至17%。
24%受訪者有計劃 非民主派增幅更大
至於促使移民最大原因，最多人話係個人自由情况變差，有35%受訪者咁答；家人前途同香港政治各有16%。香港民研副行政總裁鍾劍華分析，因疫情而計劃移民嘅受訪者比例唔算高，但政府處理疫情顯示朝令夕改、管治效力失當，而且政府受到中央、左派團體影響好大，都演化成市民決定移民與否嘅政治因素。
佢又話從3次調查睇到，計劃移民嘅香港人有上升趨勢，強調24%受訪者有計劃移民嘅比例一啲都唔低，佢相信今年7、8月離開嘅港人，有可能比舊年同期更多。
更多港聞
【Emily】在港日本人送飲品 為瑪麗醫護打氣
【明報專訊】疫情之下，醫護一直喺最前線照顧病人，在港日本人團體「香港日本料理店協會」同「香港日本食品及料理業協會」話，在港日本人社群成日用到... 詳情相關新聞
