【Emily】退公民黨區議員：從不認同「墨落無悔」
[2021.10.02] 發表
【明報專訊】新界嘅區議員下周宣誓，舊年參與或協助過民主派初選、簽過「墨落無悔」聲明嘅都可能踩紅線。今年6月退出公民黨嘅荃灣區議會主席陳琬琛同Emily講，當年事後先知公民黨以黨嘅名義簽署「墨落無悔」，佢同荃灣兩名前公民黨區議員陸靈中、黃家華都唔同意呢份聲明，認為有攬炒成分，又話公民黨簽之前應該諮詢大家。
下周宣誓 陳琬琛：希望繼續工作
琛哥話佢一直對初選涉及「攬炒」有保留，「唔支持，直情反對」，當時冇為候選人站台，亦冇主持協調會議。佢話當時曾經為失業者搵工，對方反映一旦經濟轉差就更難搵工，認為應該喺民生方面做多啲。至於點評估被DQ嘅風險，佢話都係平常心，「都做咗30幾年區議員，希望繼續工作」。
另外，同樣退出咗公民黨員嘅沙田區議員陳諾恒，前日以身體出問題為由，話要好好休養，決定即日辭任區議員。
更多港聞
【Emily】買米探劏房戶 田北辰促租管訂起始金
【明報專訊】實政圓桌立法會議員田北辰噚日同黨友莊豪鋒、社區組織協會施麗珊一齊去荃灣探訪8個劏房戶，雖然街坊同佢講唔使帶禮物，但田二少話想盡小... 詳情
【明報專訊】唔少喺獄中嘅民主派係足球迷，喺監倉就無波睇。民主黨莊榮輝話噚日同前主席劉慧卿去咗赤柱探黨友楊森，仲將基斯坦奴朗拿度（C朗）香港時...
詳情
相關新聞
