【Emily】前區議員余德寶賣畫支援地區工作

余德寶畫作《夕陽》

【明報專訊】公民黨前成員、上月辭任油尖旺區議員嘅余德寶噚日喺facebook賣畫，話最近畫咗10幅作品，有字、有水彩畫、油畫，佢上載咗5幅，話如果大家對邊幅有興趣，可以PM佢，睇吓點樣可以支持佢哋嘅工作，又可以得到心頭好。佢同Emily講，賣畫係希望延續地區工作。

余德寶話學咗三四年畫，上屆區議會尾開始學，當時得閒啲，今屆就好忙，放低咗畫筆一排，辭職後嘅呢段時間忙執拾辦事處，同時開始畫番畫。有街坊讚佢啲畫幾靚，鼓勵佢試下賣畫，用收入支持繼續做地區工作。

余德寶自言唔適合做生意，而繼續地區工作最理想係有個地方落腳，但要賣晒啲畫之後睇下有幾多預算先。佢又話，都有繼續同未辭區議員嘅民主派溝通，睇下有幾多人可以留低宣誓，同時又會繼續做地區工作，大家睇下點合作。