【Emily】借助港外籍「Super Fans」 旅發局唱好疫後香江
【明報專訊】疫情令全球旅遊業冰封,旅發局為推動旅業復蘇,邀請居港外籍人士加入「Hong Kong Super Fans」,邀請旅客喺疫情過後嚟香港,其中法國前總理Dominique de Villepin個仔、已係香港永久居民並於香港開設畫廊嘅潘雅德(Arthur de Villepin)就話,香港係亞洲重要嘅藝術文化中心,有好多國際級藝術展覽及藝廊,佢希望疫情後邀請法國朋友來港,感受獨特藝術氣氛。
旅發局話,亦正透過全球辦事處陸續邀請20個客源市場、同熱愛香港嘅人參與,已加入做「Hong Kong Super Fans」嘅包括韓國時裝設計師Nikki Lee、內地網紅Cocoa Zhou等。旅發局總幹事程鼎一話,盼借助呢班來自各地嘅香港忠實擁躉嘅力量,喺開關前為港做好口碑,鼓勵旅客來港。局方會為呢班超級粉絲安排活動,早前就邀請佢哋參與以新春為主題嘅網上導賞團,了解港人過農曆新年嘅地道習俗。