【Emily】皇仁舊生會DQ何君堯 停會籍至2022年 何:冇影響
【明報專訊】建制派立法會議員何君堯一向言行惹火,近日再度捲入風波,消息話皇仁舊生會近日決定暫停佢嘅會籍至2022年。何君堯噚日同Emily講,消息對佢「一點塵埃的影響也沒有」,又話收信時「處之泰然,冇感到驚訝」。佢話「I have nothing to lose(我冇嘢損失)」,但就唔知道皇仁舊生會有冇損失喇,只係「肯定佢無嘢gain(賺咗)」。何君堯去年喺7.21元朗襲擊事件當晚被拍攝到同白衣人握手,佢母校皇仁書院一批師生之後聯署譴責,要求皇仁舊生會廢除何嘅會籍。
7.21與白衣人握手 八成會員稱損聲譽
據了解,皇仁舊生會上年就事件收集781名會員嘅意見,結果約83%嘅人認為何君堯嘅行為損害舊生會嘅聲譽同利益,應終止其會籍。根據《皇仁舊生會會憲》,會員如果行為不當或其操守可能損害舊生會嘅聲譽或利益,經出席執委會會議嘅執委四分之三多數通過,就可以終止該會員嘅會籍,而會章訂明被終止會籍嘅人可以重新提出入會。
何君堯同Emily講,自認好「吸火力」,又提到雖然自己喺議會屬少數,但批評有建制派「除咗識擦鞋、擦阿爺之外,你冇一啲建樹令到香港同內地之間嘅實際操作(有進展)」。