【Emily】眾志賣百萬口罩 產地唔講得 怕有人搶貨 只寫「NOT MADE IN CHINA」

香港眾志賣嘅口罩包裝由主席林朗彥設計，畫咗港人過去一年由面罩、防毒面具到戴外科口罩嘅經歷，盒上註明口罩「NOT MADE IN CHINA」（非中國製，圖右）。（李紹昌攝）

眾志再蒐羅到逾百萬個口罩，首批每盒35片裝，會以成本價100蚊同「黃店」合作售賣，盒上寫「35THX」寓意立法會民主派議席可過半。（李紹昌攝）

【明報專訊】疫情之下，好多國家限制口罩出口，香港眾志預計4月底前蒐羅到逾百萬個口罩，首批每盒35片裝，會以成本價100蚊同「黃店」合作售賣。因為怕有人去當地「搶貨」，所以眾志今次唔透露口罩來源地，淨係喺盒上以英文寫「非中國製造」(NOT MADE IN CHINA)。

一盒35片 伙黃店售賣

黃色嘅包裝盒由眾志主席林朗彥設計，佢話設計係希望提醒市民抗疫期間不忘抗爭，口罩包裝盒印咗「35THX」嘅字，冀宣傳立法會民主派議席過半嘅信息，提醒市民登記做選民。林朗彥仲喺盒上畫上港人戴面罩、防毒面具同外科口罩嘅公仔，代表港人過去一年經歷過嘅事。

盒印35THX寓意議會過半

眾志秘書長黃之鋒話，上次公布喺洪都拉斯採購口罩後，大批中國商人去當地搶購，令價格升咗3倍，所以今次唔透露來源地，只係講明「非中國製」。佢引述廠商話口罩規格係ASTM Level 1、BFE同PFE超過95%。

之鋒話政府喺防疫措施上以「防疫為名，打壓為實」，令黃店難以經營，故口罩會同黃店合作，冀支持黃色經濟圈，共渡疫症難關。

噚日係香港眾志成立4周年，之鋒話今年嘅黨慶應該要延遲或者取消，而黨內換屆選舉都會延期。

更多港聞

【Emily】麥美娟加入做KOL 上「契姐會客室」 CY話唔會Run

【明報專訊】建制派個個都做網上KOL，工聯會立法會議員麥美娟都開咗個「契姐會客室」，首集請嚟經常喺網上月旦政事嘅前特首、全國政協副主席梁振英... 詳情

【Emily】駐武漢辦主任話快回家

【明報專訊】武漢星期三解封，一直留喺當地嘅特區政府駐武漢經貿辦主任馮浩賢（Vincent）噚日再喺facebook報告情况，話「把辦公室的事... 詳情

【Emily】謝偉銓復活節講蛋形建築

【明報專訊】踏入復活節假期，建築、測量、規劃及園境界議員謝偉銓（Tony）噚日喺facebook介紹復活蛋嘅意義，仲用佢嘅專業，介紹圓形同蛋... 詳情