【Emily】出圖話派錢得咗 吸5萬嬲嬲 民記「邀功」 網民：明明投反對
[2020.02.27] 發表
【明報專訊】今次《財政預算案》，多個黨派事前都要求全民派錢1萬紓解民困，噚日總算「成功爭取」，不過，民建聯喺facebook向大家公告呢個消息，出圖話「得咗啦！」派錢1萬時，就被近5萬網民派「嬲嬲」，點解會咁？事緣上周立法會財委會審議300億元抗疫基金時，公民黨黨魁楊岳橋(AY)提出臨時動議，要求向所有年滿18歲或以上嘅永久居民每人派1萬，喺建制派集體反對下，動議被否決。噚日唔少網民「翻舊帳」，質疑民建聯明明係投反對票，點解反對完又「成功爭取」呀。
葛珮帆：上周投反對為阻拉布
建制派因為呢件事，睇嚟都相當頭痕，噚日唔少立法會議員回應《財政預算案》時，都特意回應呢件事。民建聯葛珮帆主動話，好多市民問佢哋係咪反對派錢，批評公民黨明知民建聯投反對票係為咗否決討論議案，唔畀人拉布阻住通過抗疫基金，都抹黑民建聯。
對此，AY就強調投票係自由嘅，認為民建聯與其搵下台階，不如堂堂正正面對市民。
批發及零售界議員、自由黨邵家輝都主動話，呢件事解釋咗好多日，強調自由黨係第一個要求派錢或消費券嘅政黨，但如果當日300億抗疫基金未及時通過，業界會苦不堪言、好多人都會失業。
更多港聞
【明報專訊】《財政預算案》估算2019/20年度會出現赤字，係15年來首次見紅，2020/21年度更預計會出現歷來最高嘅1391億元赤字，赤...
詳情
【Emily】早過財爺公布 沙田友1萬捐議員買口罩
【明報專訊】《財政預算案》宣布向18歲以上市民派錢1萬，唔少人都討論點用好。沙田區議員趙柱幫收到街坊一張1萬元嘅支票（圖），資助佢買防疫用品... 詳情
相關新聞
