【Emily】防菌布罩「未出街」 鍾國斌被冒認貴賣
【明報專訊】全城各出其謀抗疫,外科口罩不足,自由黨黨魁鍾國斌(Felix)同理工大學合作研發可防菌殺菌、可重用嘅布口罩,惟呢款布口罩仲未正式推出市面,Felix噚日就喺facebook度話已有人冒充佢去賣口罩,大呼「有冇攪(搞)錯」(見圖),呼籲大家千祈唔好相信,否則就會買咗呢啲偽冒貨。Felix仲上載埋冒充佢賣口罩嘅海報,上面有佢嘅相,騙徒列出成人布口罩250元一個、小孩及嬰兒230元一個。
Felix同Emily講,佢嘅布口罩根本未出街,而佢定價只係100元,仲要係無小童尺碼嘅,佢批評冒充佢嘅人係賊同搶錢。佢話,係朋友去睇醫生,見到醫務所有咁嘅宣傳,於是先公告於世,希望市民唔好被人呃。
黃永志印嘜頭落搓手液
中西區、西營盤區議員黃永志唔知係咪唔想被人冒認,印咗自己個樣落去派街坊嘅酒精搓手液樽身,十足十啲老牌子藥酒嘅設計。黃永志將呢款酒精搓手液圖上載到facebook,仲加上「認住正貨 提防假冒」語句。佢話上周一名曾經到西營盤明星海鮮酒家參加聚會嘅警員確診武漢肺炎,連日來收到唔少熱心街坊及團體轉贈各種防疫用品,上周同街坊合力自製咗數百支酒精搓手液,將會分發畀大家。