【Emily】10歲鋼琴家捐36萬防疫物資贈老弱
[2020.02.25] 發表
【明報專訊】武漢肺炎疫情持續，市面「一罩難求」，唔少獨居長者就算排隊輪候都未必買到口罩。今日10歲生日嘅小鋼琴家宋林錡喺父母支持下，噚日決定捐出1萬個口罩同36萬元畀香港兒童慈善基金會，希望可以令3000戶獨居長者同單親家庭受惠。
曾經喺紐約表演嘅宋林錡，噚日將合共36萬蚊嘅表演費同利市錢，以及約1萬個口罩、300支搓手液同數十包濕紙巾捐出，預計可以令2000戶獨居長者及1000戶單親家庭受惠，當中每戶可以有10個口罩同1支搓手液。宋林錡話，喺父母口中得知好多長者買唔到口罩等防疫物資，所以希望捐出表演費同利市錢，盡量幫助有需要嘅人。
宋媽媽就話對女兒嘅決定覺得好感動，同時喺加拿大等地方「撲口罩」，以行動支持女兒。
基金會主席尹偉濤話，捐出嘅物資會分裝成「福盒」，今日開始喺沙田、馬鞍山同火炭派發物資。被問到有冇覺得政府對基層市民嘅支援不足，尹偉濤就話，政府負責做必須做嘅事，自己會再大力啲幫助社會。
更多港聞
【Emily】隔mon開人大常委會 譚耀宗舉手投票
【明報專訊】全國人大常委譚耀宗噚日留港，透過視像參加喺北京舉行嘅全國人大常委會會議，並對鏡頭舉手投票，通過原本喺3月5日召開嘅第十三屆全國人... 詳情
【Emily】政界出力派口罩 劉業強送村民 田北辰贈盲人
【明報專訊】防疫物資難求，唔少政界中人出錢出力，四圍買口罩派街坊，或捐物資畀有需要嘅人。新界鄉議局主席劉業強噚日喺facebook出帖，話鄉... 詳情
相關新聞
