【Emily】Art Basel Art Central 取消保平安

【明報專訊】原定下月中舉行嘅巴塞爾藝術展(Art Basel)同Art Central宣布，因應新型肺炎疫情爆發風險，決定取消，已買飛者可全數退款。巴塞爾藝術香港展原定下月19至21日喺會展舉行，上星期已有外國畫廊去信大會要求取消，最終大會噚日宣布取消，下屆明年3月25至27日舉行。

巴塞爾藝術展全球總監Marc Spiegler形容取消係非常艱難決定，已收集不同藝廊經營者、收藏家、專家等意見；藝術展發言人話將向參展畫廊退回 75% 攤位租金。而原定下月18至22日中環海濱舉行嘅Art Central，主辦單位喺網上發聲明，為保護參與者健康同安全，決定取消。

學校音樂節取消現場項目

另外，香港學校音樂及朗誦協會噚日公布，取消第72屆香港學校音樂節所有現場演奏或演唱嘅項目同活動，包括原定3月底舉行嘅合唱團訓練工作坊，只保留作曲項目賽事。協會喺3月13日會公布分階段退報名費嘅詳細安排。