【明報專訊】又到咗家長為仔女報幼稚園嘅季節，雖然唔少學校都可以網上或郵寄申請，但部分有名氣嘅幼稚園仲會要求指定日子親身交表，搞到家長需要排長龍。

工黨主席郭永健(細孖)噚日就為囡囡去咗兩間同一集團、位於九龍塘嘅幼稚園交表，點知門外竟然有長長人龍，「本身仲諗住walk-in就走，真係太理想?」，結果佢兩間都分別排咗近半個鐘先交到表，仲話已經比想像中快。細孖向Emily呻，話有啲無奈，建議政府不如設立系統，方便家長網上報名，最起碼唔使填咁多表。

建議設網上報名系統

至於點解揀呢間幼稚園，細孖話一來見離屋企只係10分鐘車程，二來有學券慳番唔少；另一方面佢都係「漁翁撒網」，總共報咗10間幼稚園。細孖同Emily解釋，之前報咗六七間N班，但囡囡唔係間間都啱，有時未入門口已經拉住要走，最終得一間可以完成面試，所以今次報多啲，等囡囡面試時可以自己揀鍾意邊間。