【明報專訊】盛傳將會代表建制派參選九龍西立法會補選嘅陳凱欣，日前向九龍社團聯會辭任「健康大使」，話唔想框死自己只講健康；九社聯噚日就出新聞稿，話今個星期一已接納陳凱欣辭任，同時委任香港單車隊前成員黃金寶於噚日起接任做「健康大使」。九社聯話，衷心感謝陳凱欣嘅支持同貢獻，希望未來有機會喺其他活動再合作。

九社聯早前喺紅磡殯儀館附近嘅大廈掛起陳凱欣做健康大使嘅大型廣告，早前因為打風而收下；「山竹」遠去、陳凱欣又辭咗職，有傳媒就發現有關廣告已換上黃金寶嘅宣傳品喇。

陳凱欣卸任健康大使後，繼續喺其facebook專頁公布自己動向，佢好似其他地區工作者咁，幫手清理癱瘓道路嘅塌樹、垃圾同玻璃。佢仲上載咗幾張相，個子小嘅佢戴起勞工手套幫手搬開塌樹，睇相見到佢幾咁出力，皺晒眉頭、筋都現埋咁。佢又拎起掃帚掃街，喺尖沙嘴圍起搖搖欲墜嘅招牌。