視察粉嶺高球場偶遇運動員 葉太：高球新秀讚場地理想

新民黨主席葉劉淑儀噚日去咗粉嶺高爾夫球場視察，佢話入面好多生態價值極高嘅植物，群樹環繞嘅球場不但係新界東北部一個重要嘅「綠肺」，係一個本港以至全球都難得一見嘅「自然寶庫」。（葉劉淑儀facebook圖片）

【明報專訊】「土地供應大辯論」嘅18個選項中，包括收回粉嶺高爾夫球場，成為其中一個討論焦點，多個行會成員都係高球會會員，包括新民黨主席葉劉淑儀。葉太曾經講過收回粉嶺高爾夫球場係偽命題，起完樓又唔可以解決交通問題，而且會摧毁高球運動，佢噚日特登到粉嶺高爾夫球場視察。

佢喺facebook話參觀咗球場內被評為二級歷史建築嘅球場會所，同被評為三級歷史建築嘅清朝建築風格涼亭，球場內仲有多個新界原居民古墳同金塔，而部分古墳嘅歷史甚至可追溯到明清時期；而且球場內仲有好多有生態價值嘅植物，例如屬於國家一級保護植物嘅水松。佢喺視察結束前，偶遇本地業餘高球新秀張穎怡，對方話粉嶺高球場係個非常理想嘅訓練場地，有助本地選手備戰國際賽事。

葉太話，香港高球會多年來對維護粉嶺高球場生態環境，同推動本港高球運動發展不遺餘力，希望政府喺滿足社會對土地房屋需求嘅同時，都考慮到私人會所對推動本港體育精英化、普及化同盛行化嘅貢獻。

更多港聞

前政助蔡少綿入港台顧問會

【明報專訊】政府噚日公布，再度委任被外界視為「梁粉」嘅牙醫陳建強為香港電台顧問委員會主席，有5名現任委員獲得續任，新委任嘅7名成員，包括中大... 詳情