【明報專訊】香港外國記者會(FCC)日前邀請民族黨召集人陳浩天演講，事件引起連串風波，多個民間團體噚日開記者會，要求特首林鄭月娥捍衛言論自由。適逢林太今晚8點喺facebook專頁做直播，聽?市民對《施政報告》嘅意見，新民主同盟區議員譚凱邦噚日預告會喺直播時「踩場」，喺網上質問特首點樣捍衛言論自由、結社自由同一國兩制，並呼籲市民到時踴躍留言。

約300留言 問填海大媽佔天星

林太周一喺fb發帖預告直播，話如果市民今晚唔得閒，可以事先喺佢專頁留言，直播時除咗即場同網民交流，亦會抽出部分留言嚟回應。截至噚晚帖文已經有約300個留言，內容包羅萬有，包括問林太未來填海土地嘅用途規劃、要求處理「大媽霸佔天星碼頭」，甚至為《基本法》23條立法，亦有網民話「咪扮開明肯聽民意」。

民主派民間團體噚日則發表聲明，批評前特首梁振英同建制派議員「威嚇」FCC，形容做法嚴重損害香港言論同新聞自由，令一國兩制走樣，又指林鄭月娥未有維護香港核心價值以及着力捍衛一國兩制。