【明報專訊】金管局早前聯同3間發鈔銀行公布新一批鈔票，預計今年底起分批推出。為咗配合新鈔系列，金管局位於中環嘅資訊中心，近日全面更新「貨幣」展區展覽內容，其中一個重點展品，係由藝術團隊以切碎銀紙製成嘅2018粒透明立方塊，砌出一棵名為「銀紙經」嘅紫荊樹藝術品，新展品同另一幅以硬幣砌成維港景色、名叫「零錢唱」嘅藝術品相映成趣。

舊鈔製2018透明方塊組成

金管局喺facebook專頁上載「銀紙經」製作過程嘅短片，大家可以睇到有關作品點樣砌出嚟。展品喺燈光下呈現綠、紫、紅、藍色，象徵四季交替，非常搶眼，至於方塊內嘅切碎銀紙並非新鈔，而係唔再適合流通嘅銀紙。金管局翻新「貨幣」展區後加入更多互動元素，包括教育遊戲、多媒體展板同互動裝置等，詳細介紹香港貨幣設計、防偽特徵、製作過程同其他趣味知識。