【明報專訊】扶貧委員會最近推出高中學生「與司局長同行」計劃，教育局長楊潤雄噚日就同兩個中學生——聖方濟書院嘅Jerry同聖瑪加利男女英文中小學嘅Crystal「同行」，帶佢哋體驗局長一日嘅工作。楊潤雄將同行點滴上載咗facebook，Jerry喺影片話以為局長留喺office做文件多，但原來局長一日有咁多行程要去。
佢哋噚日朝早開始一齊工作，同即將離任嘅芬蘭駐香港總領事Jari Sinkari會面、拍攝「敬師日」宣傳短片，仲同香港九龍城工商業聯會、校長團體代表交流。佢哋又齊齊到訪中西區，了解家長同小朋友嘅暑期活動，同青年、區議員交換意見。
兩個同學都話將來想投身教育相關嘅工作，而經過一日相處，楊潤雄覺得兩個同學態度認真，而且關心社會，勉勵佢?繼續努力學習同汲取經驗，相信佢哋將來無論喺任何工作崗位，都可以為社會服務。
