撞正黃雨?龍舟嘉年華開幕冷清

今年龍舟嘉年華喺中環增設人造沙灘，但因為落雨冇乜人專登嚟玩，現場只係見到啲參賽者喺度坐?，同啲水泡影?相。（李紹昌攝）

【明報專訊】一連3日嘅香港龍舟嘉年華噚日喺中環海濱開幕。可惜噚日天公不作美，天文台仲一度發出黃色暴雨警告，現場人丁單薄。

美食車「菠蘿仔食堂」店員Martin話，今年係第二年參加，但落雨令銷情比起去年同時段「差一半」。The Butchers Truck今年第一次參加，負責人Leo話本身預計噚日有3萬蚊進帳，但去到傍晚只得三四千蚊。

至於下年如果再有機會嚟，Leo話都會參加，因為大會留咗位畀美食車做生意，無謂浪費。被問到會唔會因為銷情唔好而割價，幾個負責人都話唔會，只係希望今明兩日天氣會好啲。

今年大會增設兩個藍球場咁大嘅「人造沙灘」，但同樣因為落雨，Emily噚日下午眼見得幾個參賽者坐喺度睇賽事直播，玩沙?就真係冇乜人。參賽嘅中大龍舟隊隊員Elton同阿Wing 都話，啲沙咁濕唔會玩，如果好天都會去曬下太陽。不過，嚟自新西蘭隊嘅Paki就唔多怕，同朋友嘅囝囝喺度玩沙，話最啱小朋友，唔怕悶親。佢又話前兩日咁熱，落雨正好降一降溫。