【明報專訊】慈善機構「牽手．香港」舊年做咗個電話訪問，調查約1000名市民，有七成人話想做義工，但就無時間。「牽手．香港」執行總監杜曉晴同Emily講，義工活動愈來愈多元化，總有合適市民嘅活動，例如可以去派食物包畀長者、清理行山徑嘅垃圾、種樹、講故事畀低收入家庭小朋友聽等。 「牽手．香港」今年5月5日至13日舉辦咗香港社區服務周——國際義工節，義工人數達1889，比舊年上升88%，有超過1.8萬人受惠。杜曉晴留意到多咗家庭有興趣做義工，服務長者嘅活動最受歡迎，年輕人就比較喜歡參加保護環境嘅活動。 平機會主席陳章明噚日同Emily講，做義工有助社會共融，希望更多市民做義工。一向關注長者議題嘅佢又話，唔少長者仲好健康，有心力服務社會，可以思考一下點樣推動佢哋做義工。
|
| |
| |
